Charlie Parker

Dr Charlie „Bird“ Parker (* 29. August 1920 as Charles Parker Jr. z Kansas City, Kansas; † 12. Merz 1955 z Nöi York) isch e amerikanische Muusiker (Altsaxofonist und Komponist) gsi. Er isch äine vo de Schöpfer und beste Interprete vom Biibop gsi und eso zu äim vo de wichdigste und iiflussriichste Muusiker in dr Gschicht vom Dschääs worde. Si Muusig „het dr Dschääs beiiflusst wie vor im nume die vom Louis Armstrong, wie noch im die vom John Coltrane und vom Miles Davis“.^[1]

Vo 1942 isch er bi de legendäre Dschämseschns im Monroe’s und im Minton’s Playhouse in Harlem drbiigsii, won er zämme mit em Dizzy Gillespie und em Thelonious Monk d Grundlaage für e Modern Dschääs gläit het. Er het drbii Dissonanze und rhüthmischi Verschiebige gspiilt, wo für die Zit küene gsi si, aber vo sim Gfüül für Melodik cho si. Au in seer schnälle Stück het er pregnant und stimmig mit ere hooche Intensidäät chönne improwisiere.^[2] Dr Oarker isch sit sinere Juuged droogesüchdig gsi und am Aafang vo de 1950er Joor isch si Gsunhäit immer schlächter worde. Si letscht Ufdritt het er am 5. Merz 1955 im Nöi Yorker Dschääsklub Birdland gha, wo noch iim benennt worde isch.

1. ↑ Wolfram Knauer: Charlie Parker, Reclam Verlag, Stuttgart 2014
2. ↑ Wolf Kampmann: Reclams Jazzlexikon; Stuttgart 2003, S. 398f.